121113 - 最近的香港K-POP活動

[TNC 小談]

最近"K-POP"(韓語流行音樂)係香港地區都有一定既發展度,而且各種各類既K-POP活動都比較上年多,就例如係小型商場Show、Fanmeeting、握手會、拼盤演唱會... 韓國各間經理人公司都花多左時間係東南亞、大中華地區。其實原因無他,都係想多幾個方向可以發展,未來推出新隊伍就可以吸引到更加多人留意,唔駛只係作韓國本土內競爭。另一個方法就係經理人公司會係團隊中加入其他國藉成員,例如SJ-M、EXO-M,係香港、內地同台灣都有高競爭力,成效唔錯。不過講番係香港搞K-POP活動,其實仍然有難度,<成本高>係其中既難題。


成本,即係活動製作費,例如嘉賓邀請、場地租務、人工(包括場地搭建、韓國保安、香港保安、韓國方面自家音響操作員、翻譯等等...);另外就係表演場地問題,香港可以租用既場地,“能容納人數”係令經理人公司拒絕演出既其中一個原因,經理人公司會對各種節目要求指定既一定人數,舉例如“家族活動”要用到能容納2萬
以上既場地等等...;同時場地人數都係港方主辦會考慮既事,舉例如係機場附近場地舉辦項目,入場人數可高至約12000人,咁活動費用照常理係可以按場地能容納人數由12000人分攤,門卷相對唔需要太高係一大賣點,但同時主辦亦會考慮因為活動叫座力未必足夠,而令場地唔能夠坐滿,因而蝕錢(如果贊助商唔介意俾多d既話, 主辦都唔會俾自己蝕既...)。係考慮到能容納人數過多而令入不敷支既情況下,主辦就有機會選擇另外容納人數比較少既場地,租用費會下降(場地設施、地點、能容納人數都係會影響場租高低)、風險亦會下降,但同時間活動氣勢亦會下降(主辦搞K-POP項目除左想賺錢外,當然係想提高公司知名度,呢一點就關到活動情況好壞)。

再講番之前一點,由於場地可容納人數並唔代表有相等人數入場,如果入場人數唔多,活動會因此而變得唔好睇。一來台上表演者見場地空位多可能會因此而動力大減 (雖然呢d野無一定會爆場,而又可以話從來表演者好應該有良好心理素質及專業性,要有"唔爆場"既心理準備,不過大家都係人... 唔開心既事唔講出黎唔代表無既);二來,觀眾人數唔多,氣氛不足,亦好難叫觀眾投入;三來就係表現出主辦對搞活動既能力係有問題,引伸另一問題“叫座力”係咪足夠。


“叫座力”由好多原因組成,最直接就係演出者係活動當地既知名度高低,另外就係活動日子選擇以及宣傳等等... (呢d野留番做主辦既人自己諗,我暫時唔係度講太多,以免開罪他人)。叫座力不足,就算票價唔高都唔能夠令人有興趣入場 (因為呢度係香港,香港人就係現實),主辦明白呢一點而且韓方亦中過唔少招,雙方對係香港搞K-POP項目都仍然處於極其小心既狀態,係無太多贊助、無大量資金支持情況之下都唔敢投資太多係呢方面。不過係呢個環境之中,其實都仲有少部份公司仍然"出盡力"去做,但成積就有目共睹啦... 有好有壞...

簡單講住以上咁多先,K-POP呢一環係香港其實仍可一搏...
發展度、根基都已經有一定水平,係差香港既公司方面肯唔肯投資多少少為自己鋪路... 因為唔少K-POP Fans都期望係香港區之內可以做得更多,只要香港既公司肯出多幾分力,K-POP show係香港仍然係有其價值 (笑...


Bye!

文:Alexander Leung@THE NINTH CENTURY
OKPOP
OKPOP

OKPOP與您分享最新韓流資訊、最熱門韓劇、韓星動態!

1 則留言:

  1. 其實場地都係一個影響KPOP黎開演唱會既原因
    好似文中講~機場果邊最高係12000人度~
    但如果係家族活動既話呢個數一定唔夠~
    香港冇一個大型場地俾人選擇
    好似台灣小巨蛋~日本各個大型體育館咁
    如果一個家族活動只有一萬人度參與
    就會引起反上面氣氛不高既問題

    回覆刪除